Bona Pasqua, sana e tranquila...

Amico mio, ghè scià Pasqua e anca se l’è mia facil, lasem perd pan atim al curona. Metemal lì in dun cantun, tant al ma mola mia stess. Lè lì ch'el ma dögia, ga scapa quasi da rit: "fifat"! E 'l ga resun.
Insoma, cumè tu dii prima, parlem da Pasqua, la Pasqua d'una volta, da quand sevum fiö, grand inscì, ma grand asee par giügà sì, ma anca par fa un quai lavuret, magari malvulentera, ma duvevum fal e mia dumà par castig.

Ta sa regordat al venerdì sant. I campan i sunava pü. Nagot, silenzio. Ma nüm fiö, al post di campan, ciapavum al gri-gri (che l'eva pö na raganella) e giravum al paes do volt al dì. A mesdì e la sira ai ses. A mesdì cantavum: "A sonarem par ciamà i fiö,, batista cavagnö" gri-gri, e dumandum mia chi che l'eva al Batista. A la sira inveci: "Ave Maria, Ave Maria pal nostro Signor, l'è mort in cros par nüm pecator" - gri-gri ...l

Al sabat sant, quant i campan i sa meteva dre a sunà anca mò, bisögnava lavas i öc ... ma regordi pü parché.. Ma regordi però che nava dal me nonu e dai me zii e senza fass vedè (cert che i fava parè da mia vedem) a vusava "pasqua l’öf” e lor i ma dava quiecoss: un öf dür, magari pitüraa o un ciculatin ... insomma queicoss.

Par Pasqua l'eva festa granda. Sa nava a mesa. che, par i oman la cominciava dopu la predica. Però  prima da na ca un bianchin o 'n Campari, un bianc sporc ...

A proposti da fa un quai lavuret cumè tu dii prima, m’è vignü ’n ment na roba che devi cüntat sü…A ghevum na cavara, bianca, che dopu scöla la menava là in dal bosc a mangià sü queicos.
Al bel l’eva però che prima (un poo da temp prima) da Pasqua la ma regalava un cavaret. L'eva dumà mè. Seva mi 'l padrun. Giögavum insema, sa curevum a drè, sa saltavum adoss...nava là töl la matina, sì parché lü 'l durmiva la ’n da la stala, sota 'n gerlu....

Pö, prima da Pasqua i la mazzava. ...mi piangeva, ma restava doss un magun par tüt al dì ...
Però par Pasqua, a mesdì al mangiava anca mi!

E lora?

E lora, cun la panza piena, sa po’ perdunag sia al pa che la mamma!